Santiago de Compostela. Dende a presentación do Informe Extraordinario “Menores vulnerables: desprotección e responsabilidade penal” o mes pasado, a institución do Valedor do Pobo recibiu numerosos parabéns de diversos ámbitos sobre o exhaustivo traballo realizado para analizar a situación dos nenos desprotexidos que residen en centros tutelados e a dos internos por ter cometido algún tipo de infracción.

O Colectivo Galego do Menor remitiu un escrito ao Valedor no que expresa a súa “sincera e calurosa felicitación polo claro e exhaustivo informe”. Tamén Arela, entidade de iniciativas de apoio a mocidade transmitiu vía telefónica os seus parabéns polo documento;  e a Fundación Meniños na súa páxina web recolle algunha das conclusións do mesmo. Salienta que o informe recomende “a potenciación dende a administración galega dos programas de integración familiar” que desenvolve a Fundación.
 
Nunha intervención parlamentaria na que explicou o Plan Estratéxico da Infancia e a Adolescencia para os anos 2007-2010, o propio vicepresidente da Xunta, Anxo Quintana,  mentou o informe extraordinario,  ao que se referiu como unha ferramenta útil para avanzar no compromiso coa infancia. Dende este mesmo departamento, a Secretaria Xeral do Benestar, María Xesús Lago,  agradece ao Valedor do Pobo o recoñecemento ao labor despregado nos últimos tres anos e o paso adiante que supón a elaboración do Plan Estratéxico Galego. Aplaude a proposta de maior investimento para a atención aos menores e sinala a coincidencia de criterios en cuestións como a de favorecer o acollemento familiar dos nenos, entre outras.