Santiago de Compostela, 23 de febreiro de 2012. Un grupo de estudantes do IES de Arzúa participarán a partires das 12.00 horas nunha visita guiada á sede do Valedor do Pobo. Durante algo máis de media hora e acompañados en todo momento por persoal da defensoría poderán coñecer a sede desta institución estatutaria que vela polos dereitos das persoas e por mellorar a eficiencia da administración para cos seus cidadáns.

Precisamente do funcionamento, obxectivos e utilidade do Valedor do Pobo poderán charlar os estudantes no curso da actividade. Tras recibir as explicacións precisas dos profesionais da institución, poderán expor as súas dúbidas ou comentarios acerca da mesma.

Visitas habituais

As visitas de estudantes de Secundaria e Bacharelato, así como de universitarios, resultan habituais na sede do Valedor. Diferentes grupos tiveron a oportunidade de percorrer no 2011 as dependencias do Valedor do Pobo.

Así durante o pasado mes de decembro desprazáronse ata a sede do Valedor alumnos universitarios do IES A Paralaia de Moaña (1 de decembro) e do IES Auga de Laxe de Gondomar (20 de decembro). Previamente, as portas da sede abríronse a recibir a presenza de mozos universitarios da Facultade de Dereito do Campus de Ourense (25 de novembro), dunha representación da magistratura húngara (15 de setembro), do IES Pedro Floriani de Redondela (28 de abril), universitarios da Facultade de Ciencias Sociais de Pontevedra (24 de marzo) e de escolares do Colexio Peñarredonda da Coruña (3 de marzo).

Nas súas visitas, os participantes adoitan expor as súas dúbidas ou comentarios sobre a institución algo que a longo prazo, repercute en beneficio dunha maior difusión exterior do Valedor do Pobo.