Santiago de Compostela, 1 de marzo de 2010. O Valedor do Pobo, Benigno López González, participou durante esta xornada no Parlamento catalán no acto de toma de posesión de Rafael Ribó como Síndic de Greuges de Cataluña, posto para o que resultou reelixido o pasado dez de febreiro por 117 votos a favor, superando a maioría de tres quintas partes necesarias para a súa designación.

Xunto ao Valedor do Pobo desprazáronse a Barcelona outros altos comisionados do resto das comunidades autónomas, para brindar apoio a Ribó, que ocupaba o posto de Síndic desde o 1 de xullo de 2004 e exercía o cargo en funcións desde o pasado 2 de xullo. A toma de posesión ademáis é a primeira que se celebra en Cataluña dende que se reformase a Lei do seu defensor, que dota á institución de maiores competencias, adáptaa ás previsións do Estatut e prolonga a nove anos os mandatos dos titulares.