Santiago de Compostela, 24 de novembro de 2009. Unha comitiva da institución do Valedor do Pobo, presidida polo seu titular, Benigno López González, desprazouse os pasados días 22 e 23 de novembro á localidade belga de Namur para participar no Coloquio Internacional "Mediatisation: a comunicación ao servizo da mediación" no que tomaron parte defensores de decenas de nacionalidades, principalmente de países francófonos e europeos.

Durante dúas xornadas de traballo, os asistentes puideron participar nos cinco talleres convocados sobre temas tan diversos como: Mediación e Administración comunican xuntas?, Os medios de comunicacion medios de sensibilización do político?, A mediación non é demasiado atractiva para os media?, Cando a prensa xoga ao Defensor do Pobo e, para rematar, A evolución das técnicas e medios de comunicación. Todos eles contaron con relatorios de diferentes expertos na materia, tanto representantes de diferentes medios de comunicación como das defensorías.

O coloquio coincidiu coa conmemoración, o próximo 22 de decembro, dos 15 anos da aprobación do Decreto que regula a institución do Mediateur da Rexión Valona, o primeiro órgano de mediación creado en Bélxica, motivo polo cal os asistentes puideron participar nunha cea de gala para recordar esa data.